Gjyqtarja e Apelit të Tiranës, Zegjine Sollaku është shkarkuar sot nga detyra nga Komisioni i Pavarur i Kualifikimit. Shkalla e parë e vettingut ka gjetur pasaktësi dhe mungesë burimesh financiare në raportet e dorëzuara nga gjyqtarja e Tiranës.
Pasaktësitë në deklarim dhe mungesa e burimeve financiare në vlerën e 7 milionë lekëve, i dogji karrierën bashkëshortes së ish-kryeprokurorit Thedodhori Sollaku.
Zegjine Sollaku ka një karrierë të gjatë në sistemin e drejtësisë dhe ka punuar si gjyqtare e Gjykatës së Tiranës në vitet 1992-2003. Prej vitit 2003, ajo e ushtronte funksionin në Gjykatën e Apelit të Tiranës. Procesi i saj i vetingut u krye nga trupa e drejtuar nga Xhensila Pine, me relator Lulzim Hamitaj dhe anëtarë Suela Zhegun.
Në cilësinë e vëzhguesit ndërkombëtar ishte i pranishëm Francesco Ciardi.
Gjyqtarja u mbrojt në seancë nga bashkëshorti i saj avokat, ish-kryeprokurori Theodhori Sollaku, i cili i kundërshtoi gjetjet e KPK-së për pasurinë. “Ashtu si ka rezultuar edhe nga hetimi administrativ, të gjitha transaksionet financiare janë kryer nga ana ime,” tha ai në seancën e parë, ndërsa shtoi se bashkëshortja kishte qenë e fokusuar tek detyra e saj.
Sollaku u vlerësua pozitivisht për pastërtinë e figurës si dhe nuk u konstatuan probleme domthënëse në kriterin profesional.
Bashkohuni edhe në grup, mund të ndani në çdo kohë denoncimet dhe çdo ankesë me të gjithë ndjekësit e tjerë!
